Xilli qeybo ka mid ah Gobolada dalka uu ka curtay roobkii Gu’ga ayaa waxaa soo baxaya digniino ku aadan saamaynta ka dhalan karta daadadka Roobka si bulshada Soomaaliyeed gaar ahaan barakacyaasha, qaxootiga iyo dadka Nugul ay uga feejignaan lahaayeen arintaasi.
Hay’adda Qabootiga iyo barakacyaasha Qaranka oo ka duulaysa arintaasi ayaa Muqdisho ku qabatay kulan sidii wacyi galin loo gaarsiin lahaa Bulshada Soomaaliyeed, gaar ahaan Barakacyasha iyo dadka Nugul ee dagan meelaha ay ka jiraan halista Saamaynta Roobabka .
Sidoo kole bulshada ayaa waxaa loogu baaqay ilaalinta nadaafada, ka feejignaanta waxyeelada korantada, ka foogaanshiyaha meelaha biyo mareenada ah xilliga Roobabka iyo baaqyo kale.
Kulanka kadib waxaa Warbaainta Qaranka la hadashay Guddoomiyaha Hay’adda Qaxootiga iyo Barakacyaasha Qaranka Marwo Safiya Xasan Maxamed, waxayna Dadka daggan togagga, Biyo Mareenada, Wabiyaha iyo meel kastoo halista daadka ay ka jirto ugu baaqday inay ka dheeraadaan xilli roobaadyada.
Marwo Safiya Xasan Maxamed Guddomiyaha Hay’adda Qaxootiga iyo Barakacyaash Qaranka ayaa sidoo kole iclaamisay shirweyne ay isugu imaanayaan Hay’addaha Dowladda iyo Dowlad goboleedyada ee ka shaqeeya arimaha Qaxootiga Barakacyaasha iyo sidoo kole Hay’adaha Caalamiga ee shaqeeya Gargaarka Barakacyaasha, qaxootiga iyo dadka Nugul. waxayna guud ahaan dadka Soomaaliyeed ugu baaqday inay is caawiyaan.
