Wasiirka Warfaafinta, Dhaqanka iyo Dalxiiska ee Dowladda Federaalka Soomaaliya, Mudane Daa’uud Aweys Jaamac, ayaa xafiiskiisa ku qaabilay Wakiilka Hay’adda Qaramada Midoobay u qaabilsan Waxbarashada, Sayniska iyo Dhaqanka (UNESCO) ee Bariga Afrika, Marwo Louise Haxthausen.
Wasiirka ayaa uga mahadceliyay Wakiilka wadashaqeynta qotada dheer ee u dhaxeysa UNESCO iyo Dowladda Soomaaliya, taas oo uu xusay in ay tahay mid muddo dheer soo jirtay.
Wasiirka ayaa tilmaamay in Dowladda Soomaaliya ay si gaar ah diiradda u saarayso iskaashiga ay la leedahay UNESCO, gaar ahaan dhanka casriyeynta keydka taariikheed ee weyn ee Radio Muqdisho, oo muddo ka badan 70 sano lagu uruurinayay agab qiimo u leh taariikhda iyo dhaqanka dalka. Wuxuu carabka ku dhuftay muhiimadda ay leedahay in keydkaas loo beddelo qaab dijitaal ah si loo ilaaliyo dhaxalka jiilasha soo socda.
Intii uu socday kulanka, labada dhinac waxay sidoo kale ka wada hadleen xoojinta barnaamijyada dhaqanka ee gacan ka geysanaya shaqo abuurka dhalinyarada Soomaaliyeed, iyo sidii dhaqanka loogu adeegi lahaa dib u heshiisiinta iyo is-dhexgalka bulshada.
Wakiilka UNESCO ee Bariga Afrika, Marwo Louise Haxthausen, ayaa dhankeeda uga mahadcelisay Wasaaradda soo dhoweynta diirran ee loo sameeyay. Waxay sidoo kale bogaadisay dadaallada Dowladda Federaalka ay ugu jirto casriyeynta keydka Radio Muqdisho, iyada oo ku tilmaantay tallaabo muhiim ah oo wax weyn ka tari doonta kaydinta iyo xifdinta taariikhda iyo dhaqanka Soomaaliya. Waxay intaas ku dartay in UNESCO ay si buuxda uga qeyb qaadan doonto howshaas.
Wasiirka iyo Wakiilka UNESCO ayaa kormeeray keydka Radio Muqdisho, halkaas oo ay ku arkeen agab taariikhi ah oo muhiim ah. Wasiirka ayaa wafdiga uga warbixiyay qorshaha Wasaaradda ee lagu casriyeynayo keydka, si loo badbaadiyo loogana faa’iideysto mustaqbalka.
Kulanka waxaa Wasiirka ku wehliyay Agaasimaha Guud ee Wasaaradda Warfaafinta, Mudane Cabdullaahi Xayir Ducaale, iyo mas’uuliyiin kale.
