RADIO MUQDISHO(Tanzaniya):Guddoomiye kuxigeenka labaad ee Golaha Shacabka Baarlamaanadda Jamhuuriyadda Federaalka Soomaaliya Mudane Cabdullaahi Cumar Abshirow oo isaga iyo wafdi uu hogaaminayo ay safar shaqo ku joogaan wadanka Tanzania caasimadiisa Dar es Salaam ayaa booqday xarunta safaaradda Jamhuuriyadda Federaalka Soomaaliya ee Magaaladda Dar es Salaam, taasoo uu hada dhismaheeda meel gabo gabo ah marayo.
Guddoomiye kuxigeenka labaad ee Golaha Shacabka Baarlamaanka Jamhuuriyadda Federaalka Soomaaliya oo uu xarunta safaaradda kusoo dhoweeyay safiirka Jamhuuriyadda Federaalka Soomaaliya u fadhiya wadanka Tanzania Danjire Ilyees Cali Xasan ayaa sheegay in safaaradda Soomaaliyeed ee Tanzania ay ka mid noqon doonto xarumaha ugu quruxda badan ee Safaaradaha Dalkeena ku leeyahay caalamaka, waxaana uu amaan iyo bogaadinba u jeediyay Danjire Ilyees Cali Xasan oo tan iyo markii loo magacaabay Danjiraha Dalkeena u fadhiya Tanzania qabtay shaqooyin uu Qarankeena ku faani karo, taasoo ay ka mid tahay inuu Isxilqaan ku dhisay xarunta safaaradda Soomaaliyeed ee Dalkaasi.
Guddoomiye kuxigeenka labaad ee Golaha Shacabka Baarlamaanka Jamhuuriyadda Federaalka Soomaaliya Mudane Cabdullaahi Cumar Abshirow ayaa wadanka Tanzania caasimadiisa Dar es Salaam uga qeyb galay shirweynihii 19-aad ee Guddoomiyaha Baarlamaanka Urur Goboleedka Iskaashiga dhaqaalaha Bariga Afrika iyo Guddoomiyaasha Baarlamaanadda ururkan kaasoo laba maalmood socday.
