Guddoomiyaha Maamulka Gobolka Banaadir ahna Duqa Magaalada Muqdisho, Dr. Xasan Maxamed Xuseen (Muungaab), ayaa kulan is-barasho la yeeshay Safiirka Dowladda Ingiriiska u fadhiya Soomaaliya, Danjire Charles King.
Kulanka ayaa diiradda lagu saaray xoojinta wada-shaqeynta labada dhinac, iyadoo la guudmaray arrimo ay ka mid yihiin: amniga caasimadda, la-dagaallanka argagixisada, dib-u-dhiska kaabayaasha dhaqaalaha, horumarinta adeegyada bulshada, taageerada dowlad-dhiska iyo geeddi-socodka doorashooyinka golayaasha deegaanka.
Dr. Xasan Muungaab ayaa uga mahadceliyay Dowladda Ingiriiska taageerada joogtada ah ee ay siiso Dowlad-dhiska Soomaaliya, gaar ahaan Horumarinta Caasimada iyo Gobolka Banaadir.
Waxa uu kulanka gorfeeyay mashaariicda horumarineed ee dib-u-dhiska dalka, nabadeynta iyo xoojinta hay’adaha dowladeed. Duqa Muqdisho ayaa waxa uu xusay in barnaamijyadaasi ay door muhiim ah ka qaataan kor-u-qaadista adeegyada bulshada iyo xasilinta caasimadda.
Intii uu kulanku socday, Guddoomiyaha Gobolka Banaadir ayaa sidoo kale warbixin ka siiyay Safiirka heerka guulaha laga gaaray sugidda amniga Muqdisho iyo horumarka laga sameeyay la-dagaallanka kooxaha argagixisada.
Wuxuu hoosta ka xarriiqay muhiimadda ay leedahay in bulshada caasimaddu ay helaan fursad ay si xor ah ugu doortaan madaxda matalaysa, taas oo uu ku tilmaamay mid kamid ah tiirarka dimuqraadiyadda.
Wuxuu sidoo kale cadeeyay muhiimadda ay leedahay taageero dheeri ah oo la bixiyo si loo hirgeliyo himiladaas ay bulshada Soomaaliyeed muddo dheer sugaysay.
Dhankiisa, Danjire Charles King ayaa uga mahadceliyay Duqa Magaalada Muqdisho kulanka miradhalka ah ee uu la yeeshay, isagoo carrabka ku adkeeyay sida ay dowladda Ingiriiska uga go’an tahay sii wadidda taageerida nabad waarta iyo horumar joogto ah oo ka hirgala guud ahaan Soomaaliya.
