Guddoomiyaha Hay’adda Maareynta Musiibooyinka Qaranka Soomaaliyeed (SoDMA), Mudane Maxamuud Macallin Cabdulle, ayaa kulan la yeeshay Dr. Rurik Marsden, Ku-xigeenka Agaasimaha Siyaasadda Bani’aadantinimada iyo Iskaashiga ee Wasaaradda Arrimaha Dibadda, Barwaaqo-sooranka iyo Horumarinta Dowladda UK (FCDO), oo ay wehliyaan Dr. Ranil Dissanyake – Ku-xigeenka Madaxa Dhaqaalaha,Tim Green – Hoggaamiyaha Kooxda Waaxda Falanqaynta Iyo Martin Gichuru – La-taliyaha Arrimaha Bani’aadantinimada.
Kulanka waxaa si gaar ah diiradda loogu saaray xaaladda saadaasha El Niño iyo saameynta ay ku yeelan karto Soomaaliya, xoojinta wada-shaqeynta iyo iskaashiga dhinacyada bani’aadantinimada, iyo sidii loo sii xoojin lahaa qorshayaasha diyaar-garowga iyo ka-hortagga musiibooyinka.
Sidoo kale, waxaa laga wada hadlay muhiimadda ay leedahay in la xoojiyo nidaamyada digniinta hore iyo tallaabooyinka ka-hortagga ah, horumarinta awoodda hay’adaha dowladda, iyo dhismaha u adkeysiga bulshada si loo yareeyo saameynta fatahaadaha, abaaraha iyo khataraha kale ee ka dhasha isbeddelka cimilada.
Ugu dambeyn, Hay’adda SoDMA Guddoomiyaha Mudane Maxamuud Macallin Cabdulle, ayaa bogaadiyay taageerada joogtada ah ee Dowladda UK iyo iskaashiga ay la leedahay Soomaaliya ee dhinacyada maaraynta musiibooyinka iyo arrimaha bani’aadantinimada.
