Munaasabad afur ah oo ay soo qaban-qaabiyeen ururka dhallinyarada jaaliyadda madasha Forum of Unity and democracy ayaa lugu qabtay gobolka Seattle ee dalka Mareykanka.
Waxaa ka qayb-galay kulanka jaaliyada Soomaalida,xubno ka mid ah bulshada gobolka ku nool ee diimaha kala duwan heysta iyo xubno ka socday booliska Seattle,Washington.
Munaasabadda,waxaa ay quseysay is dhaxgalka bulshada kala duwan ee Diimaha kala haystaa ee ku nool Seattle si ay xirirkooda wanagsan ee ka dhaxeeyaa bulshadaas ay u sii xoojin lahaayeen waana mid keentay in xalfadan afurka ah la iskugu keeno.
Guddoomiyaha Ururka dhallinyarada Jaaliyada Seattle ee madasha Forum of Unity and democracy,Ubax Warsame oo hadal jeedisay,waxaa ay soo hadal qaaday in madashan kulmisay bulshada kala duwan ee gobolka iyo booliska inay soo abaabuleen dhallinyarada Soomaalida ee ururka ka midka ah,kuwaaso oo ay ku tilmaamtay inay mar walba raadinayaan sidii ay wax ugu qaban lahaayeen jaaliyada Soomaalida.
Sidoo kale, waxaa munaasabadda ka hadlay qaar kamid ah xubnaha golaha deegaanka, saraakiisha booliiska iyo mas’uuliyiin kale kuwaas oo dhammaan ka hadlay ahmiyadda kulamada noocaan ah iyo sida looga baahan yahay in la xoojiyo isdhexgalka bulshooyinka kala duwan.
Ugu dambeyn Dhalinyarada Jaaliyada Seattle ee madasha Forum of Unity and democracy ayaa shahaado sharaf guddoonsiiyay gudoomiyaha ururka dhallinyarada Jaaliyada Seattle ee madasha Forum of Unity and democracy Ubax Warsame oo sheegtay marka inay si weyn ugu faraxsan-tahay shahaadada la guddoonsiiyay.
