Agaasimaha Guud ee Wasaaradda Boostada iyo Isgaarsiinta Mudane Axmed Xaaji Cabdi oo safar shaqo ku jooga dalka Kenya ayaa booqdey Xarunta hay’adda Isgaarsiinta ee dalka Kenya ( Communication Authority of Kenya -CA).
Agaasimaha Guud ayaa kulan dheer la yeeshay Agaasimaha maamulka Hirarka (Spectrum Management) ee hay’adda Mr. S. Kibe waxaana labada masuul ka wada hadleen qaabka ugu haboon ee wasaaradda Boostada iyo Isgaarsiinta dowladda Soomaaliya looga caawin lahaa dhismaha hay’adda Isgaarsiinta iyo sidii ay shaqaalaha wasaaradda Boostadu u heli lahaayeen tababar la xariira dhanka maamulka iyo maareynta Isgaarsiinta.
Waa markii labaad ee sanadkani gudihiisa uu Agaasimaha Guud ee Wasaaradda Boostada iyo Isgaarsiintu safar shaqo uu ku tago hay’adda Isgaarsiinta dalka Kenya si ay wasaaradu wax badan uga barato ugana faa’iideysato khibradda iyo aqoonta dalka Kenya ay ka gaareen maamulka iyo sharciyeynta Isgaarsiinta qaybaheeda kale duwan.
Agaasimaha guud ee Wasaaradda Axmed Xaaji Cabdi ayaa ku howlan sidii shaqaale badan loogu diri lahaa tababar ay ku soo qaadanayaan wadamada dariska ah si ay wax uga soo bartaan dalkana ugu adeegaan.
Wasaaradda Boostada iyo Isgaarsiinta ayaa bisha June bilowdgeeda qorsheyneysa inay tababar u qaado tiro ka mid ah xildhibaanada guddiga Isgaarsiinta ee Baarlamaanka Dowladda si ay wax uga ogaadaan muhiimada sharciga Isgaarsiinta iyo shaqada wasaarada muhiimka ugu tahay dalka iyo dalka.
