Cabdi Axmed Yuusuf waa wiil 25 jir ah kuna dhashay dhulka miyiga ah ee gobolka Hiiraan, waa bukaan dhib ka heysto qeybta taranka ah, waxaa la jiifiyey isbitaalka Madiina ee magaalada Muqdisho.
Maanta ayaa isbitaalkaasi waxaa ku booqday Agaasimaha Arrimaha bulshada iyo xiriirka dadweynaha xafiiska Ra’isul Wasaaraha Dr C/casiis Cabdulaahi Yuusuf iyo xubno kale.
wiilkani la xanuunsanaya xanuunka dhanka taranka ah ayaa koox warbaahinta Qaranka ka tirsan ay ugu tageen qolka laga jiifiyey isbitaalka, waxaana ay ku soo arkeen dhibaatada heysata wiilkaasi Soomaaliyeed, waxaana markii aad aragto caafimaad ahaan waa qof fayow hase ahaatee waxa uu dareemayaa niyad jab ka heysta xubinta taranka.
Maxamed Cabdi Cawaale waxa uu ka mid yahay ehelada Cabdi Axmed Yuusuf waxa uu sheegay in xanuunkani lagu dayacay goordhowna uu yimid Muqdisho markii uu u adkeysan waayay dhibka heysta.
Agaasimaha isbitaalka madiina Dr Maxamed Yuusuf oo aan weydiinay in wax looga qaban karo dalka dhibane Cabdi Axmed Yuusuf xaaladiisa caafimad waxa uu sheegay inuu u baahan yahay qaliin dhanka dibadda ah.
Agaasimaha Arrimaha bulshada iyo xiriirka dad weynaha xafiiska Ra’isul wasaaraha Dr C/casiis Cabdulaahi Yuusuf ayaa sheegay in xukuumada ay ku dadaaleyso sidii gar gaar caafimaad oo dhanka dibadda ah loogu heli lahaa dhibane Cabdi Axmed Yuusuf.
Agaasimaha arimaha bulshada iyo xariirka dad weynaha xafiiska Ra’isul wasaraha Dr C/casiis Cabdulaahi Yuusuf ayaa sido kale waxa uu kormeeray dhaawacyada ku jira isbitaalka madiina ee magaalada Muqdisho.
