Weeraryahanka kooxda Manchester City Sergio Aguero iyo tababaraha kooxda Newcastle United Alan Pardew ayaa ku kala guuleystay abaalmarinta bilaha ee horyaalka ingiriiska ee Premier League-ga, iyagoo kala noqday xiddigii iyo tababarihii ugu fiicnaa bishii November horyaalka Ingariiska.
Weeraryahanka reer Argentina oo hada dhaawac uga maqan kooxda Manchester City ayaa bishii November waxa uu sii dheereystay hogaankiisa gool dhalinta horyaalka Premier League-ga, waxana uu bishaasi dhaliyay seddex gool halka uu caawiye ka ahaa labo gool kale.
Ciyaaryahan Aguero oo 26-jir ah ayaa 14-gool ku hogaaminayo horyaalka ingiriiska ee Premier League-ga,waxana uu ku dhaliyay 15-kulan.
Dhanka kale tababaraha kooxda Newcastle United Alan Pardew ayaa isna kooxdiisa ku hogaamiyay seddex guul afar kulan oo uu ciyaaray bishii November, waxa ay sidoo kale Newcastle ka badisay 6-dii bishan December kooxda Chelsea oo ka jabisay rikoorkoodii guuldarro la’aanta ee xilli ciyaareedka.
Kooxda Newcastle United ayaa bishii November ka badisay kooxaha Liverpool, West Bromwich Albion iyo Queens Park Rangers.
Kooxda Newcastle ayaa haatan ku jirta kaalinta 7-aad ee horyaalka ingiriiska,iyadoo 23 dhibcood la wadaagta kooxda kaalinta lixaad ku jirto ee Arsenal.
