Akadeemiyada, Cilmiga, Dhaqanka Fanka iyo Suugaanta Soomaaliyeed ayaa diyaar garoow ballaaran ugu jirta xuska maalinta qorista Afkeenna hooyo, taasoo ku asteysan 21-ka bishan Janayo.
Gudoomiyaha Akadeemiyadaasi C/qaadir Nuur Xuseen oo saxaafadda kula hadlay xafiiskiisa ayaa sheegay in mas’uuliyiinta Akameemiyadda ay qaban qaabinayaan qabashada xuska maalinta qorista Afkeenna hooyo, isagoo intaasi raaciyay in Akadeemiyadda ay kaalin wax ku ool ah ka qaadatay hirgelinta iyo erey bixinta qoraalka farta Soomaaliga.
“21-ki Janayo sanadkii 1973-di ayeey aheyd markii la hirgeliyay farta Soomaaliga, isla maalintaa waxaa soo baxay wargeyski ugu horreeyay ee ku qoran farta Soomaaliga, Akadeemiyada waxaa u muhiima xuska maalintaas oo ah maalin Qaran, waana maalin Akadeemiyada meelgaar ah ugu suntan” Ayuu yiri C/qaadir Nuur Xuseen.
Gudoomiyaha ayaa xusay in Akadeemiyadda ay dadaal ugu jirto sidii xafiisyada dowladda iyo dugsiyada waxbarashada dalka looga isticmaali lahaa farta Soomaaliga.
Halkan hoose ka dhageyso hadalka gudoomiyaha Akadeemiyadda
