Maleeshiyada argagixisada ah ee Alshabaab ayaa tabar ahaan iyo isku tiirsanaanba sii wiiqmeysa, ka dib markii uu ragaadiyay khilaaf u dhexeeya horjoogeyaasha kooxda.
Qaar ka mid ah horjoogeyaasha kooxda Shabaab, ayaa bilaabay in ay kooxda isaga baxaan, halka qaarkoodna ay bilaabeen in ay ku biiraan kooxo kale oo argagixiso sida Daacish oo ka dagaallanta Suuriya iyo Ciraaq.
Maalmo ka hor garab ka tirsan Alshabaab, ayaa ku dhawaaqay in ay isaga bexeen Alqaacidda, ayna ku biireen Daacish.
In ka badan 50 ka tirsan maleeshiyadan, ayaa ka soo muuqday muuqaal Video la soo dhigay internet-ka ayagoo ku sugan buuraleyda Galgala ee gobolka Bari , kuwaas oo shaaciyay in ay isaga bexeen Alqaacida iyo Alshabaab, ayna ku biirayaan Daacish.
Kooxdan Shabaabka goosatay waxaa hoggaaminaya nin lagu magacaabo Cabdulqaadir Muumin, oo ka mid ahaa horjoogayaashii dhinaca dicaayadda iyo marin habaabinta dhallinyarada u qaabilsanaa Alshabaab.
Horjoogeyaasha Shabaab sida Axmed Diiriye iyo Mahad Karataay, ayaa aad uga soo horjeeda in lagu biro Daacish, laakiin waxaa jira horjoogeyaal kale oo saameyn leh oo u ololeynaya in Shabaab ku biirto Daacish.
Sababaha kooxdu ugu wareegeyso Daacish, ayaa la rumeysan yahay in ay ugu weyn tahay in Alqaacidda ay dhaqaale beeshay, sidaas darteedna ay uga baxayaan.
Hoggaanka Alshabaab ayaa isku dayaya in uu xakameeyo goosashada maleeshiyaadka doonaya in ay Daacish ku biiraan. Ugu yaraan 100 dabley ah ayaa la sheegayaa in la xirxiray, markii sheegeen in ay daacad u yihiin Daacish.
