Rugta ganacsiga Soomaaliyeed ayaa maanta daah furtay imtixaan laga qaadayo arday Soomaaliyeed oo shirkadda Beder Group ay u soo bandhigtay fursado shaqo, taasi oo noqoneysa shaqo abuur dadka waxbartay.
Ku dhawaad boqol arday oo wax ka baratay Jaamacadaha gudaha iyo kuwa dibadda ayaa maannta u fadhiistay imxitaan fursad shaqo ah oo ay u soo bandhigtay shirkadda Beder group, kaasi oo ah mid shaqo loogu abuurayo dadka waxbartay ee aan heysan fursado shaqo, iyadoo ay ka qeyb galeen maamulka Shirkadda, xubno ka socday rugta ganacsiga Soomaaliyeed iyo marti sharaf kale.
Suleymaan Jaamac Dharas oo shirkadda beder group u qaabilsan dhanka suuqgeynta iyo xiriirka dadweynaha ayaa ka warbixiyay fursadaha shaqo ee ay u soo bandhigeen ardayda, waxaana uu intaa ku daray in wixii hadda ka dambeeya ay shaqaalaha ku qaadan doonaan sidan oo kale.
Ku simaha Guddoomiyaha Shirkadda Beder Group Yacquub Cabdullaahi Cabdiraxmaan ayaa sheegay in u jeedka ay fursadani ugu soo bandhigeen ardayda ay tahay mid lagu doonayo in sare loo qaado howlaha ay shirkadda u heyso bulshada, islamarkaana ay shaqo abuur u noqoto dhalinta wax baratay.
Guddoomiye ku-xigeenka rugta ganacsiga Soomaaliyeed Cabdiraxmaan Cabdilaahi Aadan oo daah furay imtixaanka laga qaadayo ardayda soo buuxisay fursadaha shaqo ee ay soo bandhigtay shirkadda Beder Group ayaa xusay inay tahay tallaabo ku dayasho mudan.
Imtixaanka ayaa waxa ay qaadaysaa shirkad lagu magaacabo xisaabaadka ee Anfac, iyadoo ardayda kaalmaha hore ka gala imtixaanka lagu xulan doono wareyso gaar gaar ah oo laga qaadayo, waxaana ay tani dhiiri gelineysa ardayda Soomaaliyeed waxbartay ee aan heysan fursado shaqo.
Sawir Qaade:-Maxamed C/weli Maxamed Jaamac
