Jaamacadda Jazeera iyo Jimciyadda Asal ayaa siminaar lagu baranayay hal’abuurnimada ugu soo gabo gabeeyay xarunta 3-aad ee Jaamacadda 250 arday oo ka mid ah ardayda dugsiyada sare ka soo qalin badalanaysa sanadkan.
Siminaarkan oo galay wajigiisii 2-aad, isla markaana socday muddo labo todobaad ah ayaa ujeeddada ugu weyn ee laga leeyahay ay tahay sidii ardayda Soomaaliyeed meel waliba oo ay joogaan u noqon lahaayeen kuwa fikira oo hal’abuur cusub layimaada, si ay uga qeyb qaataan horumaka dalka.
Pro. Cabdirisaaq Maxamed Xaashi oo ah gudoomiye ku-xigeenka Jaamacadda Jazeera ahaana barihii bixinayay casharada simanaarka ayaa ku booriyay ardayda iney layimaadaan hal’abuur cusub si horumar ballaaran ay u gaarto Bulshada.
Sidoo kale Pro. Xaashi oo ku dheeraaday ahmiyadda uu u leeyahay hal’abuurku guud ahaa bulashada Soomaaliyeed gaar ahaan ardayda oo ah kuwa ugu badan oo laga doonaayo iney layimaadaan hal’abuur waxtar wanaagsan u leh guud ahaan Diinta, Dadka & Dalka ayaa xusay in ay joogteyn doonaan siminaarada nuucaani oo kale ah.
Ugu dambeyn Gudoomiye ku-xigeenka xiriirka bulshada ee Ururka Mideynta & Horumarinta Ardayda Afka Soomaaliga ku hadasha ee Asal Ibraahim Maxamed Nuur ayaa sheegay in Jaamacadda Jazeera ay ahayd Jaamacaddii ugu horeysay ee gacan weyn ka siisa Jimciyadda Asal qabsoomidda siminaarada waxtarka u leh ubadka Soomaaliyeed ee waxbarashada u hamuun qaba, isagoo u mahadceliyay madaxda iyo maamulka Jaamacadda.
Dhinaca kalana waxaa uu gudomiye ku-xigeenku tilmaamay iney ardaydu aad uga faa’iideystaan marwaliba fursadaha wacyigalineed ama lagu horumarinayo garaadka maskaxeed, iyagoo ballan qaaday ardaydu ay ka faa’iideysan doonaan siminaaradaan nuucaani oo kale ah.
