Kuala Lumpur,13 08 2018:-Gudiga ardayda Soomaaliyeed ee Dalka Malaysia, ayaa kulan ay iskugu yimaaden waxa ay been abuur ku tilmaamen warbixin been iyo aflagaado ah oo dhawaan laga qoray safarada Soomaaliya ee wadanka Malaysia.
Gudoomiyaha Gudiga ardayda Soomaaliyeed ee wadanka Malaysia Mudane Maxamed Cabdiraxaan Ismaaciil Ismail “Timo” ayaa waxba kama jiraan ku tilmaamay warbixintaas been abuurka ah oo lagu dacaayadeynayo shaqada Safaaraddu u heyso bulshada Soomaaliyeed ee ku nool dalka Malaysia, isagoo si gaar ah u xusay in uu cadeeynayo in aysan jirin ilaa iyo hada arday ka cabanaysa adeegyada ardaydu ay ka helaan safaradda.
“Hadaynu nahay ardayda Soomaaliyeed ee wadanka Malaysia wax ku barta waxaa farxad inoo ah in aan heysano safiir iyo howlwadeeno diyaar u ah u adeegidda iyo garab istaagga ardayda Somaliyeed iyo guud ahaan ummadda Soomaaliyeed ee wadanka Malaysia ku nool xilli walba iyo Waqti walba oo ay adeeg iyo garab istaag u baahdan. Waxana cod dheer ku cambaraynaynaa ka been abuurashada magaca ardayda iyo ka been sheegida adeega ay safarada ummadda Soomaaliyeed ee wadanka Malaysia ay siiso bulshadeeda, taasoo ujeedka ka danbeeyo uu yahay iska horkeenida ardayda Somaliyeed iyo safaradooda” Ayuu yiri Mudane Maxamed Cabdiraxmaan.
Gunta iyo gunaanadka hadaynu nahay ardayda Somaliyeed ee Wadanka Malaysia waxaan raali galin buuxda ka bixinaynaa gafka loo geestay howlwadeenada safarada oo uu ugu horeeyo Safiirka Dowladda Soomaaliya u fadhiya dalka Malaysia Mudane Dr. Abukar Abdi Osman Mardaadi, iyadoo magaca ardayda la adeegsanayo, sidoo kale waxaan waxba kama jiraan iyo been la dhoodhobay u aragnaa hadalada xaqiiqda ka fog ee laga sheegay safarada Soomaliyeed ee wadanka Malaysia, waxana cadeeynaynaa in adeega safarada ay ardayda u hayso uu yahay mid ay guud ahaan ardayda somaliyeed ee wax ka barta wadanka Malaysia ay ku qanacsan yihiin.
Wabilaahi Towfiiq.
Mohamed Abdirahman Ismail
Gudoomiyaha ardayda Somaliyeed ee Wadanka Malaysia.
13 August 2018
