Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud ayaa maanta ka qeybgaley tukashada salaadda jannaasada ee AUN Maxamed Rooble Jimcaale (Goobaale) oo shaley ku ku geeriyooday magaalada Muqdisho, isagoo gudanaya waajibaadkiisa qaran.
Aaska maanta loogu sameeyay Janaraal Goobaale, magaalada Mqudisho maanta waxaa sidoo kale, ka soo qeybgaley Ra’iisul Wasaare Cumar Cabdirashiid Sharma’arke, xubno ka tirsan labada gole, madaxda maamullada Galmudug iyo Koonfuur Galbeed, saraakiisha Ciidanka qalabka Sida, iyo xubno ka tirsan qoyska marxuumka.
Madaxweynaha oo hadal kooban jeediyay tukashada salaadda kadib ayaa sheegay in marxuumka uu ahaa geesi ka wada dhintey shacabka Soomaaliyeed, naftiisana u huray inuu cadowga ka dul kiciyo dadka iyo dalka.
Madaxweyne Xasan Sheekh Maxamuud ayaa marxuumka ilaahay uga baryey inuu naxariistii janno ka waraabiyo, qoyskii iyo eheladii uu ka dhintey iyo shacabka Soomaaliyeedna uu ka siiyo samir iyo iimaan.
Allah u naxariistee sareeyo guuto Maxamed Rooble Jimcaale (Goobaale) ayaa shaley ku shahiiday magaalada Muqdisho, kadib markii kooxaha nabad-diidka ay la beegsadeen gaari walxaha qarxa laga soo buuxiyay.
