Akhrinta 3aad ee Hindise Sharciyeedka Maalgashiga shisheeye waxaa Golaha Shacabka dib ugu soo celiyey guddiga Ganacsiga iyo Warshadaha ee Baarlamaanka oo iyagu sharcigan kusoo kordhiyey talooyinhka soo jeedinta Xildhibaannadu sameeyeen intii lagu jiray ka doodista sharcigan oo aheyd akhrinta 2aad.
Guddoomiyaha guddiga Ganacsiga iyo Warshadaha ee Baarlamaanka Xildhibaan Cabdullaahi Jaamac Xuseen oo ka hadlay kulanka Baarlamaanka ayaa xusay in shircigan uu baahi weyn u qabo dalka, isla markaana uu gacanta Golaha Baarlamaanka ku jiray mudo badan sidaasi darteedna uu Xildhibaannada ka codsanayo in la meel mariyo.
Related posts
Wasiiru-dowlaha Wasaaradda Ganacsiga iyo Warshadaha ee Xukuumadda Soomaaliya Mudane Maxamed Xasan Aadan oo isna ka hadlay kulanka Baarlamaanka ayaa u xaqiijiyey Xildhibaannada baahida sharcigan ay Wasaaraddu u qabto iyo mashruucyada uga xaniban dalka jiritaanka sharcigan, waxaana uu dhankiisa magaca Wasaaradda uga codsaday Baarlamaanka in la ansixiyo Hindise Sharciyeedka Maalgashiga Shisheeye.
Guddoomiye ku xigeenka Labaad ee Baarlamaanka Federaalka Soomaaliya Mudane Mahad Cabdalla Cawad oo shir guddoominayey kulanka Baarlamaanka ee maanta ayaa gebagebadii shirka u sheegay Xildhibaannada in sharcigan aanay jirin dood dambe oo laga gelayo, waxa u harayna ay tahay in loo codeeyo.
Hindise Sharciyeedka Maalgashiga Shisheeye ee dalka oo hada u gudbay marxaladihii ugu dambeeyey ayaa codeyntiisu waxa ay noqon doontaa Seddex maalmood kadib sida ku cad qodobka 50aad ee Xeer Hoosaadka Baarlamaanka.
