Xildhibaananda baarlamaanka Federaalka ah ee Soomaaliya oo maanta kulan ku yeeshay xarunta golaha shacabka ee magaalada Muqdisho, ayaa akhrinta 3aad mariyay hindise sharciyeedka Sharciga Qaxootiga, iyado akhirnta koowaadna mariyay Hindise sharciyeedyada Xanaanada xoolaha.
Mudanayaasha baarlamaanka ayaa markii ay kulanka soo xaadireen waxa ay amba qaadeen ka doodista sharciyada horyaalla.
Xildhibaan Cabdalla Boss oo ka tirsan Guddiga arrimaha gudaha ee Baarlamaanka ayaa Xildhibannada u sharxay muhiimadda uu Hindise sharciyeedkan u leeyahay dalka, isagoo ka codsaday inay meel mariyaan sharcigan.
Intaas kadib mudanayaasha baarlamaanka ayaa guda galay akhrinta koowaad ee Hindise sharciyeedka xanaanada Xoolaha, iyadoo Wasiirka Wasaaradda Xanaanada Xoolaha ee Xukuumadda Soomaaliya Mudane Saciid Xuseen Ciid uu baarlamaanka u faah faahiyay sharcigan, isagoo tilmaamay inuu ahmiyad u leedayahay dalka.
Wasiirka ayaa Xildhibaananda ka codsaday in sharcigan oo ka kooban 14 cutub, marka ay u dhamaato akhrinta loogu talagalay iyo tallooyinka Xildhibaannada ay meel mariyaan, isagoo xusay in uu ka qeyb qaadan doono horumarinta xoolaha dalkeena oo uu ku sheegay inay yihiin Kheyraadka la hubo.
Guddoomiye ku-xigeenka koowaad ee baarlamaanka Mudane Jeylaani Nuur Iikar oo shir guddoominayay kulankii maanta ayaa Xildhibaannada ka maqan shirka ka codsaday inay yimaadaan shirarka baarlamaanka, maadaama ay horyaalaan sharciyo muhiim ah.
