Nairobi, 01 February 2016 – Wasiirka Wasaaradda Warfaafinta, Dhaqanka & Dalxiiska ee Dowladda Federaalka Soomaaliya, Mudane Maxamed Cabdi Xayir (Mareye ) iyo Agaasimaha Guud ee wasaarada Warfaafinta Mudane Cabdirizaq Ali Yusuf (Bahlawi) ayaa kulamo looga hadlayay horumarinayo warbaahinta la qaatay diblomaasiin kala duwan oo fadhigoodu yahay magaalada Nairobi.
Wasiirka ayaa maanta kulamo la yeeshay Mas’uulka dhanka Warbaahinta u qaabilsan Safaarada Mareykanka Raymond Stephens iyo mas’uuliyiin la socotay. Sidoo kale Wasiirka ayaa la kulmay Sean Brooks oo ah mas’ uul ka tirsan hay’adda USAID iyo Fowziyo Cali oo ka tirsan hay’ada AECOM oo mashaariic ka fulisa Soomaaliya.
Wasiirka ayaa mas’uuliyiinta uu la kulmay warbixin ka siiyay meel marinta xeerkii saxaafada Soomaaliya,qabashada shirkii warbaahinta oo ay ka soo qeyb galeen maamulka goboleedyada ka jira dalka iyo shirkii ugu danbeyay oo ay wasaarada qabatay bishii dhamaatay oo looga hadlayay istiraatiijiyada warbaahinta ee shanta sano soo socota.
Wasiirka ayaa mas’ uuliyiintaasi kala hadlay horumarinta warbaahinta Soomaaliya iyo sidii loo dhaqan gelin lahaa Istiraatijiyada Warbaahinta Soomaaliya.
Wasiir Maareeye ayaa sidoo kale la kumay Madax Africa ee hay’adda Xaquuqul Insaanka ee Human Rights Watch (HRW) oo ay ka wada hadleen tacadiyada loo geysto suxufiyiinta Soomaaliyeed.
Wasiirka ayaa u sheegay mas’uuliyiinta hay’adda xuquuqul insaanka in la soo qabtay gacan ku dhiiglayaashii dilay wariyaashii ugu danbeeyay ee la dilay,isagoo sheegay in la dilay qaar ka mid ah gacan ku dhiilayaashii,halka kuwa kalana dhawaan la dili doono,ka dib markii ay qirteen in ay fuliyeen dilalkaasi.
Wasiirka warfaafinta,dhaqanka iyo dalxiiska Maxamed Cabdi Xayir (Maareey) ayaa la filayaa in uu la kulmo Safiirada Finland iyo midowga Yurub (EU), isagoo berri khudbad ka jeedin doonaa shirka Kooxda Taageerta Warbaahinta Soomaaliya (Somali Media Support Group) oo ay hay’adaha iyo deeq bixiyeyaasha ku mideysan yihiin.
Sawir qaade:- Cilmi Maxamed Waare
