Barlamanka Federaalka ah ee Soomaaliya ayaa maanta meelmariyay ka mid noqoshada, Hay’adda Islaamka horumarinta, iyaga oo aqrinta labaad mariyay sharciga leylitirka iyo xuquuqda siyaasiyiinta oo ay soo diyaariyeen guddiga xeer hoosaadka ee baarlamaanka.
Kalfadhiga 7aad kulankiisa 32aad ee baarlamaanka oo uu shir gudoominayay Guddoomiyaha baarlamaanka Federaalka ah ee Soomaaliya Mudane Maxamed Sheekh Cismaan Jawaari, ayaa ugu horeyn guddoomiyuhu waxa uu ka hadlay sharuucda baarlamaanka horyaalla ee maray akhrinta kowaad, labaad iyo seddexaad, waqtiga la xirayo kalfadhiga baarlamaanka oo dhawaan ay soo diyaariyeen guddiyada joogtada ah iyo in la dhameeyay dib u eegista dastuurka oo baarlamaanka la horgeyn doono 15-ka bishan aynu ku jirno.
Intaas kadib Xildhibaanada ayaa cod gacan tag ah ku meelmariyay in Soomaaliya ay ka midnoqoto Hay’adda Islaamka Horumarinta, waxaana haa ogoalatay 140 Xildhibaan, iyadoo ay diideen labo Xildhibaan, hayeeshee ma jirin cid ka aamustay sida u sheegay Guddoomiyaha Baarlamaanka Soomaaliya Mudane Maxamed Sheekh Cismaan Jawaari.
Baarlamaanka ayaa akhrinta labaad mariyay Hindise sharciyeedka xuquuqda leylitirka iyo deeqaha ay leeyihiin siyaasiyiinta dalka.
