Kalfadhiga 1-aad kulankiisa 6-aad ee Baarlamanka dawlad goboleedka Galmudug oo ay soo xaadireen 46-Xildhibaan uuna shir guddoominayay Guddoomiyaha Baarlamaanka Cali Gacal Casir ayaa maanta loo qaybiyay qorshe howleedka ay ku shaqayn doodaan afarta sano ee soo socota oo ah mudada ay jiraan ilaa 2019-ka.
Qorshe howleedka ayaa qeexaya howlaha horyaalla Baarlamanka Galmudug mudada dhaw iyo tan fogba, baahiyada Baarlamaanka ee u baahan wax ka qabashada iyo arrimo kaleba.
“Waxaan qaybinay istiraatiijiyadda golaha sharci dajinta ilaa laga gaarayo 2019-ka, 4-ta sano ee soo socota ee Baarlamanka loo doortay, ajandaha uu ku shaqayn doono ayaan hordhignay Baarlamaanka, waxa ay ka hadlaysaa Baarlamanka baahidiisa, waxyaabaha deg dega ah ee hadda uu u baahanyahay iyo waqtiyada soo socda, iyo qorsha hawleedka la rabo in la qabto ilaa 2019-ka, oo ka bilaabanaysa waqtigii la dhaariyay Xildhibaanada” ayuu yiri Guddoomiyha Baarlamanka Galmudug
Baarlamanka dawlad goboleedka Galmudug ayaa wada dadaalo salka loogu dhigayo shuruucdii uu ku shaqayn lahaa maamulkan curdanka ah ee dhawaanta dhismay.
