Danjire Jabriil ayaa xariga ka jaray bandhigga ganacsiga waafaqsan shareecada Islaamka, kaasi oo ka furmay magaalada Nairobi ee dalka Kenya.
Bandhiggan ganacsi oo ay ka qeybgaleen in ka badan 70 shirkadood oo ka kala socday dalalka Urur Goboleedka Iskaashiga Dhaqaalaha Bariga Afrika iyo kuwa ka socday dalalka kale ee caalamka.
Danjire Jabriil Ibraahim Cabdulle oo munaasabadda daah-furay ayaa ku bogaadiyey ganacsatada in tani ah tahay mid ku dayasho mudan, loon baahanyahay in barnaamijkan la gaarsiiyo guud ahaan gobolka.
“Ganacsiga xalaasha ah waxa uu noqday mid caalamka si xoog badan uga taabagalay, wadamada Afrikana aad uga shaqeeyo hadda, dhaqaale aad u fara-badan oo malaayiin dollar ah ay ku baxaan”.Ayuu yiri Danjire Jabril oo hadalkiisa ku daray “Lacagaha la filayo waxa ay gaareyaan saddex trillion, dhowrsano kadibna waxaa la filayaa in meesha ugu sareyso ay gaarto”.
Danjiraha ayaa xusay in Ganacsatada isugu timid madasha ay fursad u heystaan soo bandhiggidda ganacsi xalaal ah.
Danjire Jabriil Ibraahim Cabdulle Danjiraha Dowladda Soomaaliya ee dalka ayaa tilmaamay in Safaaradda oo kaashaneysa Mas’uuliyiinta Safaaradda Thailand ay qorsheynayaan in ay qabtaan Madal lagu soo bandhigi doono ganacsiga xalaasha ah iyo kaalinta bulshada uga aadan inay ka qaataan marka ay timaado fursadaha Maalgashi iyo midka ganacsi intuba.
