Masuliyinta maamulka gobolka Hiiraan iyo saldhiga booliska ee dagmada Beledweyne ayaa manta si wadajir ah u furay rug boolis oo laga hergiliyay xaafadda Holwadaag ee magaalada Beledweyne.
Taliyaha saldhigga booliska degmada Beledweyne Korneyl Cali Dhuux Cabdi ayaa tilmaamay in hadafka laga leeyahay in la howl galiyo rugtan ay tahay adkeynta ammaanka magaalada.
“Runtii in aan furno rugtan waxay ka qeyb qaadaneysaa sugitaanka ammaanka, horay ayaan u qorsheynay oo maamulka gobolka iyo taliska booliska ayaa isku raacay in lafuro rugtaan, markan magalladu way weynaatay ilaa 10km oo isku weer ah ayay mareysaa”. Ayuu yiri.
Taliyuhu wuxuu sheegay in magaalada oo weynaatay ay keentay in loo baahdo xarun labaad oo ay ka howl galaan ciidanka boolisku si ay u qabtaan shaqadii ay bulshada u hayeen.
Gudomiye ku xigeenka maamulka gobolka Hiiraan ee amniga iyo siyaasada Maxamed Ibraahi Cabdulaahi ayaa sheegay in magaalada Beledweyne ay u baahan tahay xarumo kale oo la mid ah xaruntaan, si muwaadiniintu ay dhaqsi u helaan adeegyada booliska, isla markaana uga qeyb qaataan sugidda ammaanka.
“Guddomiyaha degmada iyo taliyaha booliska dagmada waxaan kula dardaarmayaa in ay soo dadajiyaan rugaha kale ee dhimman si xaafaduhu ammaan u helaan” ayuu yiri guddoomiye Maxamed.
Saraakisha ciidanka booliska Soomaliyeed ee ka howgalaga magalada Beledweyn ayaa horey u sheegay in dhammaan xafadaha magaalada Beledweyn ay ka furi doonaan rugag boolis kuwaas oo siweyn uga qeyb qaadan doona sugitaanka amniga magaalada.
