Deegannada Ceelka Samow iyo Ceel Idaad oo dhanka galbeed ka xiga magaalada Baladweyne isla markana ay ku nool yihiin dad u badan xoolo dhaqato iyo beeraley ayaa waxaa xiligan soo food saartay biyo yari kaddib markii inta badan ay gureen ceelashii biyaha ay ka cabi jireen dadka iyo duunyada, maadaam lagu guda jiro xili jiilaal ah.
Ilaa kontan booyadood oo ay bixiyeen dad muxsiniin ah ayaa loo qeybiyay dadka, halka kuwa kalana loogu shubay baraago yaryar oo ay dhagax dhigeen baco.
Ibraahim Cabdi Muxumed oo loo soo wakiishay biyo dhaaminta ayaa sheegay in biyo dhaaminta ay ka bilaabeen deegaannada Ceelka Samow iyo Ceel Idaad, halkaasi oo ah meelaha ugu daran ee ay biyo yarida ka jirto.
Sheekh Maxamed Nuur oo ka mid ah culimaa’udiinka gobolka Hiiraan ayaa sheegay in muhiim ay tahay in laga qeyb qaato caawinta dadka ay soo food saartay biyo yarida.
Qaar ka mid ah dadka xoolo dhaqatada ah ee biyo dhaaminta loo sameeyay ayaa sheegay in deegannadan ay xiligan ka jirto biyo yari, isla markana meesha ugu dhow loo socdo muddo lix saacadood ah, ayna codsanayaan in il gaar ah lagu eego.
