Xili mudooyinkii dambe wadada dheer ee xiriirisa gobolada Dhexe gaar ahaan deegaano ka tirsan gobolka Galagaduud lagu arkayey kooxo xilaga habeenkii ah isbaaro dhigta isla markaana ku dhibaateeya dadka safarka ah ayaa taliska Booliiska gobolka Galgaduud gaar ahaan degmada Dhuusamareeb waxaa uu ku goodiyey in talaabo adag arintaasi laga qaadi doono.
Taliyaha Booliiska degmada Dhuusamareeb C/lahi Guuleed Karar oo warbaahinta la hadlay ayaa sheegay in talaabo adag laga qaadi doono isla markaana sharciga la marsiin doono dadkii lagu qabto inay isbaaro dhiganayaan wadada dheer ee laamiga ah sidoo kalana loo saameeyey ciidamo habeenkii roondeeya kana hortaga kooxaha dhibaatada ku haya dadka shacabka ah isagoona hoosta ka xariiqay inaan la cafin doonin cidii lagu qabto iyagoo dadka shacabka ah dhibaateynaya.
” Wax alaale iyo wixii isbaaro dhigta nuuc kastaba ha noqotee anagu hadii aan indhaha saarno xataa xabsi ma gaynayno madaxa ayaan ka jaraynaa Maamulka Gobolka waa isku ognahay hadii aan nahay ciidamada sida Booliiska iyo Nabad sugida wixii lagu soo qabtana maxkamad ayaa la gayn doonaa”Sidaasi waxaa yiri Taliyaha Booliiska Degmada Dhusaamreb C/lahi Guuleed Karar.
Arintani ayaa timid ka dib markii kooxahani ay xilaga habeenkii ah ku soo badanayeen mudooyinkii la soo dhaafay wadada dheer ee laamiga ah ee marta gobolka Galgaduud ee bartaha Soomaaliya ciidamada Booliiskuna waxaa ay sheegeen in howlgalo kala duwan la samayn doono kuwaas oo lagu baacsanayo maleeshiyaadka isku dayaya dadka wadada adeegsada inay dhibaateeyaan.
W/D:Maxamed Deeq Cabdi Maxamed Galgaduud
