Wakaaladda wararka Turkiga Anadolu Agency, oo soo xiganeysa dad goobjoogayaal ah iyo ila wareedyo amni ayaa sheegtay in diyaaradaha dagaalka ee Israa’iil, ay laba duullaan ku qaadeen dhul beereed ku yaalla aagga Madaarka Gaza.
Diyaaradaha dagaalka Israa’iil ayaa sida la xaqiijiyay laba gantaal ku garaacay gooba ay shegeen in ay ahayeen bartilmaameedkooda, kuwaa oo ku yaalla degaanka Jabal Al-Riis, oo dhaca waqooyi-bari ee magaalada Gaza.
Ciidanka Yahuuda, ayaa fiidnimadii xalay shaaciyay in ay ku soo dhaceen gantaallo, laga soo tuuray Marinka Gaza, Waxayna bayaan ku sheegay in nidaamka riddada-gaaban ee anti-missile system-ka uu qabtay mid kamid ah gantaallada, halka laba kalana ay ku dhaceen meel u dhow xayndaabka kala qaybiya Israa’iil iyo Falastiiniyiinta.
Saacadahii hore ee Saakay ayay ciidanka Israa’iil weerar ku qadeen qeybo kamid ah Marinka Gaza, iyaga oo sheegaya in markale weeraro gantaallo ah lagu soo qaaday, waxaana la sheegay in halkaas uu dagaal ku dhex maray xooggaga wax iska caabinta Falastiin iyo ciidanka Israa’iil, halkaa ayaa sida la xaqiijiyay waxaa ka dhashay dhaawacyo soo gaaray boqolaal Falastiiniyiin ah, kuwaa oo sida la sheegay badankood neef qabatoobay kadib markii loo adeegsaday waxyaabo sun ah.
