Muโasasada Kheyriga Amal oo kaashaneyna Warbaahinta Calan Qaran ayaa waxa ay gaarsiisay 24 carruur barakacayaal agoon ah oo isugu jiray wiilal & gabdho dhamaan dharkoodii ciidda iyo agabyadii kale ay ku ciidi lahaayeen.
Guddoomiyaha Muโasasada Kheyriga Amal, Sheekh Cabdi Xayi Aadam Xasan ayaa sheegay in wajiga 1-aad ee ciidsiinta carruurta agoonta ay ka faaโiideysteen intii loo qorsheeyay oo lawada siiyay ciidoodii kuwaasoo kala ahaa 12 wiil iyo 12 gabdhood oo daโdoodu u dhaxeysay 5 jiro ilaa 12 jiro, carruurtaas oo ahaa kuwii ugu dambeeyay ee ka soo barakacay abaaraha ku dhuftay dalkeena sanadkaan kuwaas oo ku nool duleedka caasimdda Muqdisho.
Sheekh Cabdi Xayi Aadam ayaa sheegay in ay intaa ka badanyihiin carruurta isku darsaday agoonimo iyo barakac kuwaasoo duruuftu ciileyso, iyagoon heli karin ciidda iyo baahiyaha gaarka ee kala duwan sida cunto, Hoy iyo agabyada kale.
Ugu dambeyn Sheekha ayaa u mahadcelin ballaaran u sameeyay dhamaan dadkii gacanta weyn kulahaa ciidsiinta carruurtaas 24-ka ah waxaana ka mida dadkaasi Guddoomiyaha Jaamacadda Jamhuuriya Eng Maxamuud Axmed Jimcaale, gabdhaha Jaamacadda Jazeera oo door weyn cayaaray, kuwaas oo dhaqaalaha qeyb kamida soo uruurshay una soo adeegay carruurta agoomaha barakacayaasha ah, sidoo kale gabdho ku nool wadanka Mareykanka oo hormuud u tahay maama Safiya Soomaali oo wax badan soo caawisay guud ahaan dadka Soomaaliyeed ee baahiyaha gaarkaa.
