Guddoomiyaha Degmada Heliwaa Cabdixakiim Cumar Cabdulle ayaa kormeer ku tegay Garoonka SOS oo ay ku diyaar garoobayan Xulka Kubadda Cagta Degmada Heliwaa oo isku diyaarinaya ka qeybgalka tartanka Kubadda Cagta Degmooyinka Gobolka Banaadir oo maalinta Jimcaha ee soo socoto ka furmaya Garoonka Banaadir Stadium ee magaalada Muqdisho.
Guddoomiyaha ayaa cayaartoyda kala qeyb qaatay diyaargarowga si ay dhiiro gelin ugu noqoto ciyaartooyda Degmada oo sanadkaan ay ka muuqato diyaar garow xoogan, isla markaana ay u ahayd maalin farxad ah booqashada uu Guddoomiyaha ugu tegay, waxaana uu ciyaartoyda u balan qaaday in uu siin doono abaalmarin ay ku farxaan hadii ay Degmada keenaan Koobka Degmooyinka Gobolka Banaadir
Mudane Cabdixakiim Cumar Cabdulle Gudoomiyaha Degmada Heliwaa ayaa looga bartay horumarinta dhinacyada arrimaha bulshada Degmada, isagoo had iyo jeer u taagan yahay dhiiro gelinta dhalinta Degmada Heliwaa, si ay uga soo kabsadaan dhibaatooyinkii soo gaaray intii ay dagaalada socdeen.
Cayaartooyda Degmada Heliwaa ayaa sanadkii tegay wacadaro ka dhigay Koobka kubadda Cagta ee Degmooyinka Gobolka Banaadir.
.
