Ciidamada Ammaanka ee Soomaaliya ayaa ka hor tagay weerar kooxda argagaxisada Al Shabaab ay ku doonayeen in ay ku qal qal galiyaan ammaanka, waxaana ciidamada oo ku sugan degmada Hodan gaar ahaan Isgoyka Al Baraka oo ku guda jira howlahooda caadiga ah fashiliyay weerarkaasi oo ay ku doonayeen in ay u adeegsadaan gaari ay ka soo buuxiyeen waxyaabaha qarxa.
Ciidamada oo ku sugnaa isgoyskaasi islamarkaan ku guda jiray sugida amniga ayaa waxaa soo istaagay halkaasi gaari ay wateen dhagar qabayaal ka tirsan argagaxisada inkastoo halkaasi ay isaga carareen kaddib markii ay arkeen sida ciidamadu ay u feejigan yihiin, waxaana ciidamadu ay ceersadeen dhagar qabayaashaasi oo aakhirkii ku qarxiyay gaariga agagaarka Xaafadda MBC Degmada Hodan kaddibna isaga cararay.
Guddoomiyaha Degmada Hodan ee Gobolka Banaadir C/qaadir Cali Kulane oo goor dhow la hadlay Radio Muqdisho ayaa faah faahin ka bixiyay sida uu u dhacay howlgalkaasi, isagoo sheegay in howlgalkaasi lagu guuleystay islamarkaana ciidamada si dhaqse leh ay kaga hortageen isku daygaasi dhagaraqabayaasha ay ku doonayeen in ay ku dhibaateeyaan dadka Soomaaliyeed.
Guddoomiyaha ayaa sheegay kaddib markii dhagar qabayaasha oo watay gaari waxyaaba qarxa ay ka soo buuxiyeen ay arkeen ciidamada ay isku dayeen in Isgoyka Al Baraka Ay ka baxsadaan ayaa ciidamada si dhaqse leh kaga daba tagay wadadii ay ku carareen taasi oo suura galisay in dhagar qabayaasha markii ay arkeen in ciidamada ay ku raad joogaan qarxiyay gaariga, iyadoo dhagar qabayaasha oo sedex ahaa uu midba meel u cararay oo mid ka mid ah ciidamada ay dileen halka mid kalena ay dhaawaceen inkastoo midka kale weli ciidamada ay ku raad joogaan.
