Wasiirka Hub ka dhigista iyo dhaqan celinta maleeshiyaadka ee dowlad goboleedka Koonfurgalbeed iyo wafdi uu hogaaminayo ayaa ku wajahan degmada Diinsoor ee gobolka Baay, si ay dhiiri gelin ugu sameeyeen cutubyo ka tirsan ciidanka gaarka ah ee booliska Koonfu galbeed.
Wasiirka Hub ka dhigista iyo dhaqan celinta maleeshiyaadka Xasan Xuseen Maxmaed ayaa Radio Muqdisho u sheegay in socdaalka ay ku tegayaan magaalada Diinsoor ay ugu horeyso abaal marino, la siinayo cutubyo ka tirsan ciidanka booliska Koonfurgalbeed ee dalka, kuwaasi oo howlgallo ka dhan ah Al-Shabaab ka fuliyay nawaaxiga Diinsoor.
“Ciidamada waxa ay sameeyeen howlgallo lagu ciribtirayo Al-Shabaab, waxaana qorsheyneynaa inaan dhiiri gelin u sameyno ciidanka, si ay u xoojiyaan howlgalka ka dhanka ah haraadiga Al-Shabaab” ayuu yiri Wasiirka.
Mudane Xasan Xuseen Maxamed ayaa hoosta ka xariiqay inay jiraan maleeshiyaad iyo horjoogayaal isu soo dhiibay gacanta ciidanka, waxaana uu baaq u diray kuwa ku haray dhanka Shabaab inay ka faa’iideystaan cafiska ay dowladda Federaalka ah u fidisay.
