Ciidamada dowladda federaalka iyo kuwa dadka deegaanka oo sii wada howlgalada ka dhanka ah argagixisada Al-shabaab ayaa saakay la wareegay deegaano hor leh oo ku yaalo galbeedka magaalada Baladweyne, halkaas oo ay nabad-diidka isaga carareen.
Ciidamada ayaa la wareegay deegaanno u dhaxeeyo degmooyinka Ceelcade iyo Ceelcali gaar ahaan deegaanka Hidiga Caag-Xoog iyo deegaanno kale, kuwaasoo qiyaastii 90-KM dhanka galbeed kaga beegan Baladweyne.
Xildhibaan Cabdiraxmaan Cabdi Iidow oo ka mid ah xildhibaanada Hirshabeelle oo qeyb ka ah howlgalka ayaa sheegay in ciidanka wax iska caabin ah kala kulmin maleeshiyadii ku sugneyd deegaanka, waxayna baxsadeen ka hor inta aysan ciidamada iyo dadka deegaanka oo iskaashanaya soo gaarin.
Saraakiisha Ciidamada xoreynta gobolka Hiiraan ayaa balan qaaday in ay sii wadayaan dagaalka gobolkaas looga ciribtirayo maleeshiyaadka Al-shabaab.
