Ciidamada Booliiska Dowlad Goboleedka Koofur Galbeed ayaa maanta Maleeshiyada kooxda Al-Shabaab ka soo furtay ku dhawaad 20-ruux oo u afduubnaa.
Howlgal Qorshaysan oo ay ciidanka Booliiska Gaarka ah ee Koofur galbeed ay ka sameeyeen Deegaanka Shanqoloow oo u dhaxeeya degmooyinka Diinsoor iyo Baardheere oo ka kala tirsan gobalada Baay iyo Gedo.
Wasiirka Hub ka dhista Maleeshiyaadka iyo Tababarada Ciidanka Xasan Xuseen ayaa Warbaahinta Qaranka u sheegay in dadkaan ay ku xirnaayeen Saldhig ay leeyihiin Maleeshiyadaan Argagixisada ah.
Dadka ay soo badbaadiyeen ciidanka ayaa waxaa ka mid ah dad Ganacsato ah oo maleeshiyadaan ay ka doonayeen inay ka qaataan Lacag baad ah, iyo waliba shaqsiyaad kale oo ay u soo jeediyeen eedeymo ka dibna ay ku amreen inay bixiyaan Lacag Badan oo baad ah.
Dadka laga soo bad baadiyay Maleeshiyada Al-Shabaab ayaa soo dhaweeyay talaabada ciidanka Booliska Gaar ah ee maamulka Koofur Galbeed, kuwaas oo mudooyinkaan waday howlgalo ka dhan ah maleeshiyadaan caadaysatay in shacabka Soomaaliyeed ay dhacaan.
