Iyadoo mudooyinkii u danbeeyayba ay soo ifbaxayeen walaac laga muujinayay lacago shilin Soomaali been abuur ah, isla markaana lasoo galiyay magaalada Gaalkacyo ee xarunta gobalka Mudug ayaa waxaa maanta ciidamada booliiska ee dowlad gobaleedka Galmudug ay gacanta kusoo dhigeen qaar ka mida lacagahaasi ee soo galay suuqyada magaalada Gaalkacyo
Saraakiisha ciidanka booliiska oo lacagtaasi been abuurkaa saxaafada usoo bandhigay ayaa ka warbixiyay soo qabashada lacagtaan been abuurka iyo waxa kaga qorsheeysan ciddii lagu qabto iyadoo magaalada soo galineeysa
Dambi baare Gaashaanle Cawil Nuur Rooble ayaa ugu horeeyn ka hadlay lacagtaan iyo waxa ay uga duwantahay lacagaha shilinka Soomaaligaa ee haatan la isticmaalo.
“Waa lacag faalsa ah oo been abuur ah dambiilayaashii lagu soo qabtayna, gacantaan ku heeynaa Maxkamad waan ku soo saareeynaa, dadka waxaan uga digeeynaa hantidooda ineeysan faalsadaasi kala bixin, iskana ilaaliyaan meeshii ay ku arkaana ay soo sheegaan, si looga qabto inaan lagu dhicin xaashidaas kalarka loo soo yeelay, meeleey ka socatana aysan jirin, waxaana khadka ay soo gashay lacagtaan 28/07/2015 saakana dadbaan ku qabanay, walina waa kusii daba jirnaa cidii lagu arkana sharciga ayaa la marsiin doonaa”.ayuu yiri Cawil.
Duqa Dagmada Galkacyo ee dowlad Gobaleedka Galmudug mudane Bile Diini Cali oo isna ka hadlay madasha lagu soo bandhigay lacagtaan been abuurka ah ee ay soo qabteen ciidanka booliska Galmudug ayaa uga mahad celiyay dadaalka ay u hayaan bulshadooda
“Marka hore waxaan salaan hawada u marinayaa guud ahaan ciidamada booliiska Galmudug ee had iyo goor u taagan ineey ilaaliyaan dadka raba ineey dhibaateeyaan shacabka reer Galmudug qaasatan ciidamada booliiska ee ka howl gala dagmada galkacyo waxaan u heynaa ammaan aad u balaaran hadaan nahay shacab iyo maamulba waxaad halkaan ku arkeeysaan lacagtaas faalsada ah waad ujeedaan waa xaashi rinji lasoo mariyay xaashidaas waxaa loogu talagalay in lagu dhaco hantida Ummadda Soomaali”ayuu yiri Duqa Gaalkacyo.
Ma ahan markii u horeeysay oo bulshada Soomaaliyeed ee ku nool guud ahaan gobalada dalkeena ay walaac ceynkaan oo kale ah ka muujiyaan lacagaha shilinka Soomaaliga ee lasoo sameeysto ayagoo been abuur ah.
