Saraakiisha ciidanka XDS ayaa faah-faahin ka bixiyay howlgal ka dhan ah maleeshiyaadka Shabaab oo ay ka billaabeen deegaanno ka tirsan gobolka Hiiraan.
Cutubyo ka tirsan ciidanka XDS iyo kuwa AMISOM oo ka ambabaxay Magaalada Beladweyne ayaa u ruuqaansaday Galbeedka Gobolka Hiiraan, si ay halkaasi uga sifeeyaan haraadiga maleeshiyaadka UGUS.
Col. Isaaq Cismaan Idiris oo ka mid ah Saraakiisha ciidanka XDS ee Gobolka Hiiraan, ayaa sheegay in 24-kii saac ee lasoo dhaafay ay ciidamada Dowladda iyo kuwa AMISOM ay maleeshiyaad ka tirsan Shabaab ka saareen deegaanno dhowr ah oo ay ku dhuumaaleeysanayeen.
Wuxuu sheegay in dagaal ka dhacay deegaan lagu magacaabo Ceeldheer ay ciidamadu ku dileen maleeshiyaad ka tirsan UGUS kuwaaoo gaaraya Todobo, isaga oo xusay ineey jiraan dhaawacyo kale oo ay la carareen kooxda UGUS.
Col. Isaaq Cismaan Idiris, ayaa intaasi ku daray in ciidamadu ay gaareen deegaano hor leh oo ka tirsan Gobolka Hiiraan, kuwaasoo ay ka mid yihiin deegaanka Ceel Cali oo dhaca galbeedka gobolkaasi, isagoo xusay ineey sii wadi doonaan howlgallada noocan ah tan iyo inta haraadiga kooxda laga sifeeynayo dalka oo dhan.
Howlgalkan ayaa qeyb ka ah qorshayaasha ay dowladdu dalka uga xoreeyneyso maleeshiyaadka Shabaab si dalka looga dhigo meel nabad ah oo ka caaggan argagixisada Shabaab.
.
