Ciidanka xoogga dalka iyo kuwa daraawiishta dowlad goboleedka Jubbaland ayaa maleeshiyada argagaxisada Al-shabaab kala wareegay deegaanno kamid ah gobolka Jubbada hoose.
Deegaanada ay Ciidanku la wareegeenย waxaa ka mid ah deegaanka Janaay Cabdalle oo 60-KM dhanka galbeed kaga beegan magaalada Kismaayo ee xarunta gobolka Jubbada hoose.
Firxadka maleeshiyaadka nabad diidka Al-shabaab oo ka cararay dagaalka culus ee uga yimid naftood hurayaasha Qaranka ee xoogga dalka ayaa gaaray deegaanno ka fog Janaay Cabdalle sida ay inoo sheegeen saraakiil ka tirsan ciidanka.
Argagaxisada oo marwalba u taagan dhibaateynta dadka rayidka ah ayaa markii looga itaal roonaaday dagaalka waxey miinooyin geliyeen waddooyinka soo gala deegaanka, waxaase kasoo saaray ciidanka xoogga dalka oo utaagan difaaca Qaranka.
Maleeshiyada ayaa sidoo kale burburisay ceel-biyood ay dadka deegaanku biyaha ka cabi jireen oo ku yaalay halkaas.
Deegaankaan ayaa ahaa midka kaliya ee maleeshiyadu ay lacagaha baadda ah uga qaadi jirtay gawaarida isaga kala goosha magaalada Kismaayo iyo deegaannada dhanka xuduuda Kenya.
