Ciidanka Xoogga Dalka Soomaaliyeed, gaar ahaan Guutada 8-aad ee qeybta 60-aad ayaa howlgal lagu sifeyno Khawaarijta ka fuliyey deegaanada dhaca dhulka howdka ah ee kala qeybiya gobolada Baay iyo Bakool, si looga hortago dhagarta cadowga.
Howlgalka waxay Ciidanku ku burburiyeen goobo ay maleeshiyaadka Khawaarijta ah ku qora jireen dhallinyarada ay khaldaan iyo deegaano ay dadka shacabka ah ee mara wadooyinka isku xira gobolada Baay, Bakool iyo Gedo ay ku baadi jireen.
Taliyaha Guutada 8-aad ee qeybta 60-aad ee Ciidanka Xoogga Dalka Dhamme Axmed Sheekh Cabdiraxmaan oo hogaaminayay howlgalka ayaa Warbaahinta Qaranka u xaqiijiyay in howlgalka lagu burburiyay goobo ay Khawaarijtu dadka ku dhibaateyn jireen, isla markaana ay kusii raad-joogaan firxadka nabadiidka.
