Xukuumadda Ciraaq ayaa ku casuuntay Iiraan iyo dalalka Khaliijka Carabta oo ay Dehraan kala dhexeyso xurgufta siyaasadeed shir madaxeedka ka dhacaya magaalada Baqdaad, iyadoo ujeedadu tahay qaboojinta xiisadaha soo dhaweeyey colaad furan sanadihii la soo dhaafay.
Saraakiisha Ciraaq ayaa sheegay in kulankan sidoo kale looga hadli doono dagaalka Yemen, burburka Lubnaan iyo xiisadda biyaha ee gobolka, isla markaana shirkan uu sahli karo isu soo dhawaashaha Sacuudiga iyo Iiraan.
Xiisadaha u dhexeeya muddada dheer Sacuudi Carabiya iyo Iiraan ayaa sii xumaaday kadib weerarkii 2019 ee lagu qaaday warshadaha saliidda ee Sucuudiga kaas oo muddo kooban kala jaray wax soo saarka saliidda Sucuudiga.
Xukuumadda Riyaad ayaa ku eedeysay Iiraan inay ka dambeysay weerarkan, laakiin eedeynta Dehraan ayaa beenisay.
Illaa iyo hadda Kuwait ayaa ah dowladda keliya ee Khaliijka ee xaqiijisay ka qaybgalka shirkan, iyada oo shaacisay in direyso Ra’iisul Wasaaraheeda.
Masar iyo Urdun oo labaduba xulufo la ah boqortooyooyinka Khaliijka Carabta, ayaa lagu casuumay kulanka Baqdaad oo sidoo kale ay imaanayaan madaxweynaha Turkiga iyo Madaxweynaha Faransiiska Emmanuel Macron.
Horraantii bishaan, Wasiirka Arrimaha Dibadda Sacuudiga Amiir Faysal bin Farxaan Al Sacuud ayaa sheegay in si dhiirran Iiraan ay si xun ula dhaqmeyso arrimaha Bariga Dhexe, oo ay ku jiraan Yaman, Lubnaan iyo biyaha gobolka.
