Madaxweynaha Dowlad Gobaleedka Hirshabeelle Maxamed Cabdi Waare ayaa sheegay in laga heshiiyay Tabashooyinkii gaarka ahaa ee Hirshabeelle ay u qabtay Dowladda Federaalka, sidaa darteedna ay wada shaqeyn la yeelan doonaan Dowladda dhexe.
Madaxweyne Waare ayaa Dowladda Federaalka ugu baaqay inay ka mira dhaliso wada hadalada xalka loogu raadinayo Tabashooyinka ay qabaan Maamulada hoostaga Dowladda dhexe.
“Dowladda waa inay ka mira dhaliso wada hadalada socda, dhibaatooyinka aan sheeganana ay wax nagala qabtaan, hadii arrimaha jiro ay xaliyaan Maamulada kalena waxay dhihi doonaan Wada hadalka faa’iido ayaa ku jirta”.ayuu yiri Madaxweynaha Hirshabeelle.
Maamulka Hirshabeelle ayuu sheegay Madaxweynaha inuu gacan ka geysan doono isu soo dhaweynta Dowladda Federaalka iyo Dowladda Gobaleedyada si loosoo afjaro isfaham waaga taagan.
