Masuuliyiinta ka qeyb galay kulankaan ayaa waxaa ka mid ahaa Guddoomiyaha Gobolka Mudug ee Galmudug Mudane C/raxmaan Cali Diiriye Isxal, xildhibaano, Kormeeraha Waxbarashada Wasaaradda Waxbarashada Galmudug ee Gobolka Mudug Sahal Nuure Guddoomiyaasha Deegaanada Sadex-Higlo, Bandiiradleey iyo Madax ka socotay Haayado dhanka waxbarashada taageera.
Kulanka ama Munaasabadda ayaa ka dhacay Deegaanka Sadex-higlo ee Gobolka Mudug waxayna masuuliyiintu Sagootin u sameeyeen 9 Arday oo markii ugu horeysay ka qalin badashay Dugsiga hoose dhexe iyo Sare ee Deegaanka Sadex-higlo kuwaasoo Waxbarasho u aadaya Jaamacadaha Dalka iyo dibada kuwaasoo qeyb ka ahaa Ardaydii sanadkaan galay Imtixaanaadkii Dalka kaasoo ay qaadaysay Wasaaradda Waxbarashada Qaranka Soomaaliyeed.
Munaasabadda ayaa waxaa goobjoog ka ahaa Waalidiinta dhalay Ardaydaan kuwaasoo u mahad celiyay Wasaaradda Waxbarashada Federaalka Soomaaliya iyo cidkasta oo gacan ka geysatay in Caruurtoodu soo gaaraan Halkaan.
Masuuliyiintii ka qeyb gashay kulankaan ayaa sheegtay inay muhiim tahay in kor loo qaado waxbarashada Gobolka Mudug loona baahan yahay in Waalidiinta Deegaanka Sadex-higlo hormuud u noqdaan.
Guddoomiyaha Gobolka C/raxmaan Cali Diiriye ayaa kula dardaarmay in Bulshada ku nool deegaanada Galmudug gaar ahaan Gobolka Mudug ay doorweyn ka qaataan kor uqaadista Waxbarashada si ay kaga soo baxaan arday la jaan qaadi kara Imtixaanaadka Qaran ee Sanad kasta qaado Dowladda Federaalka Soomaaliya.
waa Dufcadii koowaad ee ka qalin jabisa Dugsiga Sadex-higlo Primary and Secondary in kastoo hoos u dhac xoogan ka jiro Arrimaha Waxbarasho ee Gobolka Mudug kaas oo saamayn ku yeeshay Caruurta ku nool deegaano badan oo ka tirsan Gobolka Mudug.
