Guddoomiye Ku-xigeenka Amniga iyo Siyaasadda Gobolka Banaadir Mudane Maxamed Axmed Diiriye (Yabooh) oo uu wehliyo Xoghayaha Guud ee Maamulka Gobolka Banaadir Mudane Faysal Caraale Afrax iyo Guddoomiyaha Degmada Kaxda Cabdullaahi Sheekh ayaa ku baxay dhibaato ka dhalatay dhismo Masjid soo dumay oo ku yaala Degmada Kaxda, kaasi oo sababay dhaawacyo soo gaaray shaqaalihii dhismaha waday iyo dad shacab ah oo ka ag-dhawaa.
Mas’uuliyiinta Maamulka Gobolka Banaadir ayaa xaqiijiyay in la xiray Injineerkii dhismaha halkaasi ka waday iyo dad kale oo mas’uuliyada dhismahaasi qeyb ka lahaa, si loola xisaabtamo, iyagoo sheegay in aan la aqbali karin dhibaatooyinka soo noq noqday ee ka dhasha bur-burka ku yimaada dhismayaasha laga wado Magaalada Muqdisho.
Maalintii shalay ayuu Guddoomiyaha Gobolka Banaadir Ahna Duqa Magaalada Muqdisho Mudane Yuusuf Xuseen Jimcaale (Madaale) daah-furay Dib-u-howlgelinta Sheybaarka Hubinta Tayada Dhismaha, si loo tayeeyo dhismooyinka Magaalada Muqdisho, asigoo sheegay in wixii hada ka danbeeya la hubin doonno tayada dhismaha iyo qalabka lagu dhisayo, lana hubin doonno aqoonta Injineerada.
