Agaasinka Caafimaadka Gobolka Banaadir, ayaa maanta baaris caafimaad waxay u sameeyeen dadkii ka soo barakacay xaafadaha degmada Warta Nabadda oo daadad ay qaadeen guryihii ay daganaayeen.
Dadkaan oo saameyn ku yeeshay Roobkii da’ay ayaa xalay seexday xarunta degmada Warta Nabadda ka dib markii ay u gurmadeen maamulka Gobolka Banaadir.
Agaasimaha Caafimaadka Gobolka Banaadir mudane Dr. C/raxmaan Axmed Maxamuud, ayaa booqday xarunta ay ka socotay howlaha Caafimaadka iyo gurmadka loo sameynayo dadkaasi.
Agaasimaha oo fulinayo amarka guddoomiyaha gobolka banaadir ahna duqa Muqdisho mudane Yuusuf Xuseen Jimcaale (Madaale), ayaa sheegay inay ka shaqeynayaan sidii adeeg Caafimaad oo tayo sare leh ay u heli lahaayeen dadka soo barakacay ee saameynta uu ku yeeshay roobkii ka da’ay Caasimadda.
Koormeerka waxaa Agaasimaha ku wehlinaayay guddoomiyaha degmada Warta Nabadda iyo guddoomiye ku xigeenka Arrimaha Bulshada.
