Safiirka JFS ee dalka Ethiopia Danjire Cabdullaahi Maxamed Warfaa ayaa xafiiskiisa Safaaradda ee Addis Ababa ku qaabilay madaxa Xafiiska Taageerada Qaramada Midoobay ee Soomaaliya “UNSOS” Aisa Kacyira, iyagoo ka wada hadlay shaqada xafiiska UNSOS uu ka hayo Soomaaliya.
Danjire Warfaa, ayaa Aisa Kacyira la wadaagay horumarka la taaban karo ee ay Dawladda Federaalka Soomaaliya ka sameysay dhinacyada Amniga, Dhismaha Dawladnimada, Horumarinta dhaqaalaha iyo arrimo kale, isagoo Qaramada Midoobay gaar ahaan UNSOS uga mahadceliyay taageerada ay siiyaan Dawladda Soomaaliya.
Related posts
“Intii uu kulanku noo socday waxaan ka wada hadalnay oo aan fursad u helay in aan iftiimiyo horumarka la taaban karo ee ay Dawladda Soomaaliya ka sameysay dhinacyada Amniga, Dhismaha Dawladnimada, Horumarinta dhaqaalaha iyo arrimo kale, anigoo aad ugu farxay inaan la wadaago horumarka ay Soomaaliya ku tallaabsatay sannadihii u dambeeyay” ayuu yiri Danjire Warfaa.
Danjire Warfaa ayaa durba bilaabay dedaalo kala duwan oo uu ku dar-dar gelinayo kuna adkaynayo xiriirka Diblomaasiyadeed ee Soomaaliya kala dhexeeya dalalka iyo hay’adaha Caalamiga ah.
