Tartan Qur’aan akhris ah oo ay ka qeybgaleen arday badan oo Muslimiin ah oo ay Soomaali qeyb ka ahaayeen ayaa lagu qabtay Masjidka Al Huda, magaalada Nairobi ee dalka #Kenya.
Danjiraha Dowladda Soomaaliya ee dalka Kenya Danjire Jabriil Ibraahim Cabdulle oo ka qeybgalay tartanka Qur’aan akhriska ah ayaa bogaadiyay sida ardayda ay u soo bandhigeen Qiraa’ada Qur’aanka Kariimka ah, kuwaasi oo ay ka muuqatay kalsooni dhab ah.
“Tartanka Qur’aanka waxaa ka qeybgalay Ardayda dalka Kenya oo dhan, waxaana qeyb ka ahaa arday ka timid xeryaha Qaxootiga ee Xagardheer Dhadhaab, waxaana ay ahaayeen arday u heelan akhrinta Qur’aanka, oo ay ka muuqatay arday leh tarbiyad wanaagsan”. Ayuu yiri Danjire Jabril.
Danjiraha ayaa uga mahadceliyay Macalimiinta iyo Waalidiinta sida hagar la’aanta ah oo ay u garab istaageen ardayda uguna dhiirigeliyeen muddadii ay baranayeen xifdinta Qur’aanka Kariimka, taasi oo u suurtagelisay in tartankan qiimaha badan leh ay ka qeybgalaan, waalidiintana looga baahanyahay in ay Ubadkooda ku barbaariyaan tubta toosan.
Danjire Jabriil ayaa u duceeyay dhamaan Ardayda ka qeybgashay tartanka Qur’aanka Kariimka ah ee lagu qabtay Masjidka Al Huda ee magaalada Nairobi “Alle SWT ha u barakeeyo hibadaas uu Alle siiyay dhallinyarada, if iyo aakhiroba ha ku guuleeyo”.
