Wakiilka gaarka ah ee Midowga Afrika u qaabilsan Soomaaliya Danjire Maman S. Sidikou ayaa soo dhaweeyay go’aankii baarlamaanka Federaalka ah ee Soomaaliya shalay uu codka kalsoonida kala laabtay Xukuumaddii Ra’iisul wasaare Cabdiweli Sheekh Axmed Maxamed kaddib kulan ay ku yeesheen xarunta Golaha Shacabka ee Muqdisho
War-saxaafadeed ka soo baxay Xafiiska Danjire Maman S. Sidikou ayaa lagu sheegay in go’aankii baarlamaanka uu soo afjaray khilaafkii in muddo ah taagnaa, isla markaana ay soo dhaweynayaan natiijada ka soo baxday.
Danjire Maman S. Sidikou ayaa sidoo kale soo dhaweeyay sida Madaxweyaha Jamhuuriyadda Federaalka ah ee Soomaaliye mudane Xasan Sheekh Maxamuud iyo Ra’iisul wasaare Cabdiweli Sheekh Axmed Maxamed ay u aqbaleen go’aankii baarlamaanka.
War-saxaafadeedka ayaa lagu xusay in natiijadii ka soo baxday kulankii baarlamaanka ee shalay ay muujineyso in hay’adaha dowladda ay ku filanyihiin xalinta mashaakilaadka dhexdooda ah.
Wakiilka gaarka ah ee Midowga Afrika u qaabilsan Soomaaliya Danjire Maman S. Sidikou ayaa xusay in Midowga Afrika ay ka go’antahay taageerada ay siinayan dowladda, si loo gaaro hiigsiga cusub ee 2016-ka, waxaana uu Madaxweynaha ku booriyay in uu badiyo latashiyada ku aadan Ra’iisul wasaaraha cusub ee uu soo magacaabi doono, si loo dhameystiro hirgelinta nidaamka Federaalka ah, dib u eegista dastuurka KMG ah ee dalka iyo in sanadka 2016-ka ay dalka ka dhacdo doorasho xor ah.
