Dagaal u dhaxeeyay dadka deegaanka iyo malleeshiyaadka Shabaab ayaa ka dhacay deegaanka Luuq jeeloow ee gobolka Hiiraan, waxeyna dadka deegaanku ku guuleeysteen in ay Shabaab ka saaraan halkaasi, horjooge ku dileen horjooge caan ah oo magaciisa lagu sheegay Maxamed Cali “Dhegaweyne”.
Jeneraal Cumar Aadan Xasan “Cumar dheere” oo ka tirsan saraakiisha ciidanka XDS ayaa Radio Muqdisho u sheegay in dagaalkaasi oo soo billowday habeen hore uu socday shalay ilaa xalay, isagoo tilmaamay in dadka deegaanku ay ku guuleeysteen iney Shabaab ka saaraan deegaanka Luuq Jeeloow oo 20-km dhanka galbeed kaga toosan magaalada Beledweyne.
Related posts
Wuxuu intaasi ku daray in dagaalkaasi lagu dilay horjooge caan ku ahaa dhibaateeynta dadka deegaanka oo lagu magacaabi jiray Maxamed Cali “Dhegaweyne”, iyo Sadex ka mid ahaa ilaaladiisa.
Dagaalkan ayaa yimid kaddib markii maleeshiyaadka Shabaab ay dhawaan dileen nin nabaddoon ahaa, islamarkaana ay kordhiyeen dhibaatooyinki ay ku hayeen dadkaasi, taasina waxey sababtay in dadka deegaanka ay is abaabulaan kaddibna ay dagaal kala hortagaan maleeshiyaadka hororka ah ee Shabaab, sida uu xusay Jeneraal Cumar Dheere.
Dhinaca kale Jeneraalka ayaa sheegay in dadka deegaanka oo garab ka helaya ciidamada ay xaqiijinayaan ammaanka deegaanka Luuq Jooloow oo si buuxda looga sifeeyay maleeshiyaadka Shabaab.
Maleeshiyaadka Shabaab ayaa deegaanka Luuq Jeeloow ku lahaa bar kontorool oo ay lacago baad ah uga qaadi jireen gaadiidka,iyadoo dhaqaale farabadana uu ka soo geli jiray halkaasi.
