Guddoomiye ku-xigeenka maamulka iyo maaliyadda ee degmada Buulo burte Liibaan Cabdi Burisow ayaa tilmamaya in webiga Shabeelle ee mara degmada laga cabsi qabo in uu fatahaad sameeyo, isla markaana uu sameyn ku yeesho dadka iyo duunyada, isagoo codsaday in gacan lagu siiyo sidii arrinkaasi looga hortagi lahaa.
Guddomiye ku-xgieenka ayaa hoosta ka xariiqay in kan maamul ahaan ay ku howlanyihiin dadaallada ay kaga hortagayaan fatahaadda webiga.
“Magaalada labo ayay u qeybsantaa oo bari iyo qorax sin, marka haddii uu fatahaad dhaco saameyn ayay ku yeelaneysaa bulshada degmada ku dhaqan, cabsiga hadda way iska jirtaa, laakiin waxaan rajeyneynaa in gacan nagula siin doono sidii looga hortagi lahaa fatahaadda webiga” ayuu yiri Liibaan
Sidoo kale Guddoomiye ku-xigeenka maamulka iyo maaliyadda ee degmada Buulo Burte Liibaan Cabdi Burisow ayaa sheegay in tan iyo markii maleeshiyada Al-Shabaab laga saaray degmada ay dib u soo laabteen adeegyada bulshada, sida caafimaadka, waxbarashada iyo goobo kale oo muhiim ah.
“Waxaan ku guuleysanay in aan dib u soo celino adeegyadii waxbarashada, caafimaadka iyo kuwa kale, sidoo kale waxaan dib u habeyn ku sameynay garoon diyaaradeed oo diyaaraduhu ay ku soo degi karaan” ayuu hadalkiisa ku daray.
Degmada Buulo burte waxa ay ka midtahay meelaha dib gacanta dowladda ugu soo laabatay markii laga saaray argagixisada Al-Shabaab, taasi oo iminka ay muuqaneysa dadaallada uu maamulka ugu jiro dib u soo celinta adeegyadii guud ee bushada, balse cabsida hadda jirta ayaa ah in webiga uu fatahaado sameeyo
