Dhalinyaro ku nool degmooyinka gobolka Galgaduud ayaa maanta tababar ku saabsan xallinta khilaafaadka iyo xoojinta nabadda loogu qabtay magaalada Dhuusa Mareeb ee xarunta gobolka Galgaduud.
Tababarka oo uu soo qaban qaabiyay maamulka gobolka Galgaduud islamarkaana ay ka qeybgaleen 50 dhallinyaro ah oo ka kala timid degmooyinka gobolka ayaa lagu baranayay isdhexgalka bulshada iyo kaalinta ay dhallinuyaradu ka qaadan karaan xallinta khilaafaadka.
Gudoomiyaha degmada Dhuusmareeb Macalin C/raxmaan “Geedaqoroow” oo furay tababarkaasi ayaa sheegay in tababarkani uu muhiimad gaar ah leeyahay, maadaama lagu baranayo qiimaha nabadda, faa’iidada wadajirka, dhibaatooyinka colaadda iyo kaalinta ay dhallinyaradu ka qaadan karaan is dhexgalka bulshada.
Isu duwaha gobolka Galgaduud ee wasaaradda dhallinyarada iyo Isportska Mustaf Maxamed Xaji oo furitaanki tababarkan ka hadlay ayaa sheegay in wasaaraddu dhalinyaradu ay qeyb ka qaadaneyso is dhexgalka dhallinyarada gobolka, isagoo ku boorriyay dhallinyarada gobolka iney kaalin wax ku ool ah ka qaadaan horumarka gobolka.
