Wiil 17-sano jir ah oo ka soo jeeda dalka Australian ,isla markaana ku caan baxay Wiilkii Ukunta,kaddib kolkii uu madaxa Ukun kaga dhuftay siyaasi ku xadgudbay muslimiinta ayaa lacago gaaraya 70-kun oo doolar ugu yaboohay qoysaska dadkii wax ku noqday weerarkii loo geystay labadii masjid ee magaalada Christchurch ee dalka New Ziland.
Will Connolly oo ka soo jeeeda magalada Melbourne ayaa maalinimadii shalay baraha bulshada ku soo qoray in lacagahaasi uu u dhiibayo 2 urur samofal oo qaabilsan taageeridda dadkii wax ku noqday weeraradii labadii masjid.
Lacagahaasi ayaa lagu waramay in ay soo uruuriyeen taageerayaasha wiilkaasi xilli ay ku socotay dacwad loo heystay oo la xiriirtay ukun uu madaxa uga dhuftay Senetor hore (Fraser Anning) oo ka hadlay weeraradii lagu fuliyay labadii masjid,kaas oo ku tilmaamay muslimiinta in ay yihiin asal raac,ayna sababeen weeraradaasi.
15-kii Marso ayeey aheyd markii Brenton Tarrant oo ka soo jeeda Australian uu toogasho u geystay dad muslimiin ah oo ku sugnaa labo masjid oo ku yaala dalka New Zilan, kaas oo qudha ka jaray 51-ruux.
