Wasiirka Wasaaradda Gaadiidka iyo Duulista Hawada Xukuumadda Federaalka Soomaaliya Marwo Fardowsa Cismaan iyo Guddoomiyaha Gobolka Banaadir ahna Duqa Magaalada Muqdisho Mudane Yuusuf Xuseen Jimcaale (Madaale) ayaa ka qeyb-galay kulan looga hadlaayay Dhismaha Biyamareenka Garooka Diyaaradaha Aadan Cadde iyo Daaweynta Biyaha Qashinka, si xal-waara loogu helo dhibaatooyinka xilli roobaadyada.
Mashruucaan oo qeyb ka ah Qorshayaasha hortabinta u leh Maamulka Gobolka Banaadir sanadkaan 2024 ee dib-u-dhiska Biyamareenada Magaalada Muqdisho iyo maareynta bulaacadaha ayaa waxaa goobjoog ka ahaa, Guddoomiye Kuxigeenka Howlaha Guud ee Maamulka G/Banaadir, Maareeyaha Guud ee Garoonka Aadan Cadde, Hey’adda Maareynta Musiibooyinka, Ganacsato, qaar ka mid ah Safaaradaha wadammada shisheeye iyo Agaasimeyaal ka tirsan G/Banaadir.
Madashaan ayaa lagu meel mariyay dhismaha Mashruucan laga hirgelinaayo Garoonka Diyaaradaha Aadan Cadde ee Magaalada Muqdisho, si xal waara loogu helo dhibaatooyinka Biyamareen ee xilliyada qaar sababa hakad ku yimaada dhaq-dhaqaaqa Garoonka Diyaaradaha iyo in bay’adda laga ilaaliyo dhibaatooyin caafimaad oo ka dhasha biyaha xilli roobaadyada.
