Tiro Soomaali ah ayaa isugu soo baxay afaafka hore ee xarunta dowladda dhexe ee Mareykanka, halkaasi ay ku muujiyeen sdia ay uga xun yihiin xarigii dhawaan loo geystay lix dhallinyaro Soomaali ah, kuwaasi oo lagu eedeeyey in ay ku biiri rabeen Kooxda ISIS, isla markaana aan la soo bandhigin caddeymo rasmi ah,
Ma jirin mas’uul ka socday dowladda Maraykanka oo halkaasi yimid, balse waxaa goobta joogay saxaafada dalka Maraykanka iyo kuwo kale, dadkii ka qeyb galay dibad baxani ayaa ka muuqatay shacuur kuwaasi oo ku qeylinayey, Cadaalad, Sinnaan iyo in xornimo la siiyo dhallinyarada la xiray, maadaama ay ku doodayaan in aan loo heynin cadeymo ku filan.
Dhallinyarada la xiray ayaa gaaraya ilaa lix, waana tirada ugu badan oo hal mar lagu soo eedeeyey in ay ku biiri rabeen kooxda ISIS, Afar ka mid ah ayaa lagu qabtay magaalada Minneapolis halka labada kale lagu qabtay Gobolka Arizona.
Mid ka mid ah hooyada dhashay laba wiil oo lagu magacaabo Ayaan oo la hadashay warbaahinta Qaranka Soomaaliyeed ayaa sheegtay in aysan jeclaysan qaabka loola dhaqmay, markii lala baxayey mid ka mid ah wiilashaeeda oo qeybta dambe ee guriga joogay, waxayna hadalka intaasi ku dartay in ay hurdaysay xiligii lala baxayey wiilkeeda.
Sadiiq Warfaa oo ka mid ah madaxda jaaliyadda oo la hadlay Warbaahinta Qaranka ayaa sheegay in ay raadinayaan xaquuqda muwaadiniinta Soomaaliyeed, isla markaana ay bilaabayaa barnaamijyo wacyi gelin ah oo lagu bad baadinayo jiilka Soomaaliyeed ee soo koraya.
Maxamuud Nuur oo ka mid ah madaxda Jaaliyada Soomaalida ayaa wax laga xumaado ku tilmaamay in la beegsado dhallinyarada Soomaaliyeed, uuna codsaday in ay helaan cadaalad, isagoo ugu baaqay Ummadda Soomaaliyeed ee Maraykanka degan in ay gacan ka geystaan sidii loo badbaadin lahaa carruurta Soomaaliyeed.
Ma ahan dhallinyaradii uga horeeyey ee lagu eedeeyey in ay ku biirayeen kooxaha argagixisaada ah, walow markani hey’adda dabagalka ee FBI aysan cadeymo ku filan horkeenin maxkamadda, balse codsatay in dhalinyaradani xabsiga lagu sii haayo ilaa ay ka keenayaan cadeymo buuxda, taasi oo uu aqbalay xaakimkii xukunka riday, wallow abuukaatayasha u doodayey dhallinyaradani Soomaaliyeed, iyaganu codseen in la sii daayo dhalinyarada, maadaama aanan la heynin cadeymo ku filan eedeymaha loo soo jeediyey, ayna xaq u leeyihiin inay xoriyaddooda dib u helaan.
Liban Hussein,
Minneapolis, USA
Warbaahinta Qaranka.
