Diyaaraddii ugu horeysay oo ku duushay taargada Soomaaliya ayaa maanta rakaab ka qaaday garoonka diyaaradaha Muqdisho, iyadoo si nabad gelyo ah ku geysay Gaalkacyo.
Waa diyaaradii ugu horeysay ka duusha garoonka diyaaradaha Aadan cadde ee magaalada Muqdisho, iyadoo heysata ruqsadda Soomaaliya, maadaama la bilaabay diwangalinta diyaaradaha caalamiga ah, waxaana maanta ay u duushay magaalada Gaalkacyo ee xarunta Gobolka Mudug.
Diyaaradaan oo ah kuwa sida gaarka ah loo yeelayay ayay shirkadda diyaaradaha freedom ku guuleysatay in rakaab ay ka qaaddo magaalada Muqdisho, maadaama todobaadkii hore la siiyay diwaan gelinta ruqsadda diyaaradaha ee Soomaaliya.
Mukhtaar Xaamud oo ah maamulaha shirkadda diyaaradaha Freedom ayaa sheegay in shirkaddoodu ay noqotay tii ugu horeysay ee qaadata Ruqsadda ay bixiso dowladda Soomaaliya, isagoo intaa ku daray inay ku faraxsanyihiin adeegyada ay u hayaan bulshada Soomaaliyeed.
Maareeyaha Hay’adda Duulista Rayidka Soomaaliya Mudane Axmed Macalin Xasan ayaa ugu hambaleeyay shirkadda diyaaradaha freedom dadaalka ay gelisay iyo dhaqangelinta habraaca ay dowladda ku diwaangalineyso diyaaradaha caalamiga ah ee ka howlgala dalka.
